Një ditë mbas protestës së mbajtur në Athinë të fermerëve grekë, këtë herë në shesh kanë dalë edhe bletërritësit. Ata kërkojnë subvencione nga shteti, kredi te buta, ribursime të karburantëve, por edhe sanksione dhe kufizime të importit të mjaltit që hyn nga Kina dhe Turqia me kosto më të ulët.
Bletërritësit thonë se kostot e tyre tejkalojnë parashikimet, ndërsa kërkuan subvencion për çdo koshere ose mbështetje ekonomike për çdo kg mjaltë të prodhuar.
Ata kërkuan të hiqen kufizimet për t’ju shërbyer bletëve të tyre në zonat pyjore në verë, për shkak të ndalimit të tyre për të ndezur tymueset, prej frikës së zjarreve në pyjet e vendit, një problem ky evident që i pengon ndjeshëm ata të marrin prodhimin e duhur të bletarisë. Ata protestuan me kamionët e tyre në qendër të Athinës, duke bllokuar rrugën para Parlamentit në sheshin Sindagma.