Një 32-vjeçar shqiptar është vënë në pranga në Emiratet e Bashkuara Arabe. M. Çeliku ishte shpallur në kërkim nga Gjykata kundër Korrupsionit dhe Krimit të Organizuar për mashtrim të kryer në kuadër të grupit të strukturuar kriminal.
“Në vijim të punës së kryer në bashkëpunim me partnerët ndërkombëtarë, me objektiv lokalizimin, kapjen dhe vënien në pranga të shtetasve të shpallur në kërkim, strukturat e Policisë së Shtetit kanë siguruar informacion se një shtetas i akuzuar nga GjKKO-ja, për mashtrim të kryer në kuadër të grupit të strukturuar kriminal, fshihej në Emiratet e Bashkuara.
Ky informacion i shkëmbyer menjëherë me partnerët, nëpërmjet koordinimit të Interpol Tiranës dhe Interpol Abu Dhabit, ka mundësuar finalizimin në Emiratet e Bashkuara Arabe, të operacionit policor të koduar “Platformat”. Gjatë operacionit u bënë të mundur lokalizimi, kapja dhe vënia në pranga, me qëllim ekstradimin në Shqipëri, e shtetasit M. Çeliku, 32 vjeç.
Gjykata e Posaçme e Shkalles së Parë për Korrupsionin dhe Krimin e Organizuar i ka caktuar 32-vjeçarit, masën e sigurisë “Arrest në burg”, për veprën penale “Mashtrimi kompjuterik”, kryer në kuadër të grupit të strukturuar kriminal”, njoftoi policia.
Çeliku akuzohet se nëpërmjet call center-it ka mashtruar persona në Shqipëri, Maqedoni të Veriut, Gjeorgji dhe Ukrainë për të investuar në tregje online. Nga mashtrimet grupi kriminal ka përfituar shuma të mëdha parash.
Policia thotë se vijon puna për të kryer ekstradimin e këtij personi në Shqipëri.