Aplikimet për lidhjet e reja me rrjetin elektrik mund të kryhen online, pa qenë e nevojshme të shkohet në sportel. Operatori i Shpërndarjes së Energjisë Elektrike ka shtuar këtë shërbim për qytetarët apo bizneset e interesuar, ndërsa për herë të parë mundësohet edhe gjurmimi i aplikimit.
Kjo nënkupton se në çdo moment mund të verifikohet nëse nevojitet dokumentacion shtesë, apo nëse ka dalë një preventiv punimi, duke lehtësuar këtë procedurë që deri më tani mund të kryhej vetëm në sportelet e Kujdesit ndaj Klientit.
Paralelisht me ofrimin e këtij shërbimi online, OSHEE ka ndërmarrë edhe procedurat për ndryshimin e rregullores për lidhjet e reja me rrjetin e shpërndarjes, teksa në kërkesën drejtuar Entit Rregullator të Energjisë, që është autoritetit që mund t’i miratojë, thuhej se qëllimi është reduktimi i kohës së ofrimit të shërbimit dhe lehtësimi i procedurave për konsumatorët.
Një nga ndryshimet kryesore në rregullore lidhet me përcaktimin e kërkesave që duhet të përmbushin vetëprodhuesit e energjisë nga dielli për t’u lidhur me rrjetin e shpërndarjes.
Po ashtu, ajo parashikon edhe disa ndryshime në drejtim të lidhjeve të reja për fuqinë instaluar 0-20 kW, ku tashmë nuk do të dorëzohen, fotokopja e certifikatës së regjistrimit, genplani i vendndodhjes së objektit, si dhe deklarata e instalimi dhe protokolli i tokëzimit.
Kjo pikë do të bëhet me vetëdeklarim, ndërsa arsyeja është eleminimi i dokumentacionit që përgatitet nga palë të treta dhe ka kosto shtesë për aplikantin, duke shkurtuar njëkohësisht edhe kohën e aplikimit.