Prestigjiozja britanike “The Guardian” i është rikthyer sërish Shqipërisë, këtë radhë me një artikull kushtuar gjithë atyre që janë në kërkim të shpirtit të aventurës.
Si një ndër 10 vendet ku mund të gjesh një eksperiencë të tillë emocionuese, renditet edhe vendi ynë. Një udhëtim me kalë në shtigjet e lashta malore të qytetit të gurtë të Gjirokastrës, është sugjerimi ideal që “The Guardian” zgjedh të bëjë për lexuesit e saj në morinë e sporteve që zhvillohen në natyrë në vendin tonë.
Por sipas së përditshmes, me këtë shëtitje turistët mund të eksplorojnë luginat, kështjellat e rrënuara, manastiret bizantine, si dhe mund të shijojnë natyrën dhe fshatrat e bukur. Në rreshta po ashtu theksohet se vizitorët netët mund t’i kalojnë në shtëpitë e thjeshta, duke gatuar dhe ngrënë me familjet vendase.
Shqipëria renditet në këtë artikull mes vendeve si Italia, Portugalia, Spanja, Franca etj. Për këtë artikull ka reaguar edhe kryeministri Edi Rama, i cili ka zgjedhur ta ndaj në profilin e tij në Facebook, duke ndarë me ndjekësit një pasazh të shkrimit ku flitet për Shqipërinë.
Edhe këtë vit duket se Shqipëria do të jetë një magnet për vizitorët e huaj, të cilët njëjtë si vitin që lamë pas, mbushën Shqipërinë duke e kthyer në atraksion me rritjen më të madhe të vizitorëve në Europë.
Në 2023 ishin mbi 237 mijë britanikë që vizituan vendin tonë, një rritje me 42% me një vit më parë.
