Një ekip aerkeologësh në Zakotorac të Kroacisë, kanë bërë një zbulim të madh së fundmi.
Mediat kroate shkruajnë se gjatë kërkimeve të bëra, është gjetur një përkrenare ilire rreth 2500 vite e vjetër. Zbulimi i përkrenares është rezultat i një kërkimi katër vjeçar nga ana e arkeologëve të cilët gjetën një sasi të madhe materialesh të vlefshme që mund të ndryshonin njohuritë ekzistuese mbi kolonizimin grek të Mesdheut në mijëvjeçarin e fundit para Krishtit.
“Tani paraprakisht mund ta datojmë këtë përkrenare në shekullin e gjashtë para Krishtit. Është shumë interesante që këtu shfaqen dy lloje të ndryshme në të njëjtin vend, gjë që në fakt flet për vazhdimësinë e fuqisë së komunitetit në fjalë. Këto helmeta kanë qenë gjithmonë një simbol i një lloj statusi dhe pushteti”, tha profesor Hrvoje Potrebic nga Departamenti i Arkeologjisë i Fakultetit Filozofik në Zagreb.
Një helmetë të paktën 2500 vjeçare
Gërmimet në këtë vend kanë filluar 4 vjet më parë dhe që në vitin e parë u zbulua një përkrenare greko-ilire dhe ishte një surprizë e madhe në atë kohë.
“Përkrenarja e dytë u gjet dhjetë metra larg vendit ku u gjet e para. Ato janë pak më ndryshe, mendojmë se i përket shekullit V-VI, që do të thotë se është pak më e vjetër se e para, por ende duhet të përcaktoni detajet”, pohoi arkeologia e re Kalebota.
Përkrenarja u gjet në një dhomëz gjysmërrethore, rrethuar me një grumbull të madh gurësh, ndërsa e para u gjet në zonën pranë varrit me shumë artefakte të tjera si kopsa, rruaza, enë qeramike, qelibar e të tjera.