Pak ditë më parë në rrjetet sociale qarkulloi një video ku shfaqej momenti teksa Rektori i Universitetit “Luigj Gurakuqi” në Shkodër lyhej me bojë të zezë në kokë dhe trup.
Ngjarja mori komente të ndryshme në mbështetje të protestës së studentëve, por edhe kundër këtij veprimi.
Gjatë ditës së sotme ka reaguar studentja që i hodhi bojën Rektorit duke marrë përsipër gjithçka, ndërkohë që shpjegon edhe shkakun.
Ajo quhet Pranvera Paci, studente e Fakultetit të Drejtësisë në këtë universitet dhe si më poshtë shpjegon shkaqet që e çuan në këtë veprim:
“Dje unë Pranvera Paci, studente e Fakultetit Juridik, në Universitetin e Shkodrës “Luigj Gurakuqi”, kam ndërmarr një akt ndaj rektorit të këtij universiteti duke e bojatisur atë. Prandaj sot doja të sqaroja që, akti im ishte simbolik. Akti ishte si përgjigje ndaj kërcënimeve që ai na ka bërë gjatë protestës e deri sot. Akti ishte sepse ne si studentë mendojmë se ai nuk po e kryen punën për të cilën paguhet nga paratë tona.
Ne si studentë i kërkojmë llogari rektorit tonë arrogant, për transparencë të fondeve, sallat që janë jashtë standarteve dhe të pamjaftueshme, korrupsionin e lartë dhe vendosjen në punë të godinës së re.
Masat ndaj meje mund të jenë personale, por akti jonë ishte për të mirën e përbashkët. Unë dhe studentët e tjerë do t’i shkojmë deri në fund qëllimit për arsim cilësor.
Ne nuk frikësohemi! Rezistenca do të vazhdojë!”
