Opozita ka dërguar për të dytën herë në Gjykatën Kushtetuese çështjen e mandatit të deputetes të PS , Olta Xhacka.
44 deputetë të opozitës kanë firmosur ankimimin në kushtetuese duke kërkuar nga gjykata të rrëzojë vendimin e parlamentit dhe të bëjë interpretimin e Kushtetutës për çështjen e mandatit të deputetit.
“Duke e konsideruar të papranueshme mbrojtjen politike dhe pengimin ndaj drejtësisë që mazhoranca po bën për rastin e ish-ministres dhe deputetes Olta Xhacka, duke penguar zbatimin e vendimit nr. 1/2023 të Gjykatës Kushtetutese, dëshirojmë të theksojmë se ky veprim përbën minim të demokracisë dhe rrënon besimin e qytetarëve tek Gjykata Kushtetuese dhe sistemi i drejtësisë. Ky është dhunimi më flagrant që Kuvendi i ka bërë Kushtetutës në 33 vjet, si dhe një mesazh i qartë i vullnetit politik të mazhorancës për çimentimin e kulturës së pandëshkueshmërisë, përmes ofrimit të mbrojtjes politike ndaj deputetëve të mazhorancës dhe pengimit të zbatimit të vendimeve të Gjykatës Kushtetutës,” shkruhet në ankimin e opozitës.
Ankimimi u dorëzua në kushtetuese nga kreu i grupit parlamentar të PD-së Gazment Bardhi.
“Dorëzuam ankimimin kundër vendimit politik të Edi Ramës për ti dhënë mbrojtje nga drejtësia Olta Xhaçkës. Për herë të parë në historinë e pluralizmit Kuvendi ka shpallur veten sovran nga vendimet e Gjykatës Kushtetuese,” deklaroi Bardhi.