Mbrëmjen e sotme në “Wembley” kundër Borussia Dortmundit, Carlo Ancelotti është në kërkim të Ligës së Kampionëve të pestë në karrierën e tij, e 15-ta për Real Madridin, “mbretin” e padiskutueshëm të kompeticionit.
“Gjëja më e rëndësishme në këtë lloj ndeshjeje është të vendosen ide të qarta në kokën e lojtarëve. Sa më të qartë të jenë ata, aq më pak nervoze do të jetë skuadra. Emocionet janë aty dhe secili i menaxhon sipas karakterit të vet, – shpjegoi trajneri italian në konferencën për shtyp.
Do të ndjejmë emocione, merak, frikë… Megjithatë, frika është pjesë e rëndësishme për t’i bërë gjërat mirë këtë sezon. Gjëja më e rëndësishme është të fitosh Ligën e Kampionëve, sekreti ynë është qëndrimi dhe shpirti.
Të arrish deri në finale është një gjë e vështirë, shumë e vështirë. Kur je kaq pranë është normale të kesh frikë për të mos humbur. Champions-i për mua dhe Realin nuk është fiksim, por ta fitojmë mbetet gjëja më e rëndësishme”.
Për formacionin: “Courtois luan titullar në finale, Lunin do të jetë gati në pankinë”.