Në një kohë që javën e ardhshme më (5 qershor) pritet të vijë në Shqipëri, për të parë nga afër Shëngjinin dhe Gjadrin, aty ku kanë nisur punimet për kampin e emigrantëve, kryeministrja e Italisë, Giorgia Meloni, ka falënderuar homologun shqiptar Edi Rama për marrëveshjen e nënshkruar mes tyre.
Gjatë fjalës së saj sot në një takim elektoral, Meloni i tha mbështetësve të saj se kryeministri Edi Rama meritonte një përqafim, për ndihmën ndaj vendit të saj.
“Le t’i japim një përqafim kryeministrit socialist të Shqipërisë, Edi Ramës, i cili u masakrua vetëm sepse ndihmoi Italinë”, ka thënë mes të tjerash Meloni.
Më 6 nëntor 2023 kryeministri Edi Rama dhe kryeministrja italiane Giorgia Meloni nënshkruan në Romë marrëveshjen për ndërtimin në Shqipëri të dy qendrave për strehimin e emigrantëve. Sipas marrëveshjes porti i zbarkimit do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre. Kapaciteti maksimal i numrit që do të presë qendra në Shqipëri nuk mund të jetë më shumë se 3 mijë emigrantë në muaj.