Shqipëria po përgatit terrenin për zhvillimin e industrisë së prodhimit të armëve. Për këtë qëllim, në proces konsultimi publik është dhe një projektligj i posaçëm që parashikon jo vetëm rregullat, por edhe lehtësitë për kompanitë që do të përfitojnë licencë për këtë veprimtari. Referuar nismës së depozituar, procesi i licencimit dhe monitorimit do të kryhet nga Agjencia e Industrisë së Mbrojtjes, që do të jetë pjesë e Ministrisë së Mbrojtjes.
Për të përfituar lehtësitë e parashikuara në ligj, kompanitë e prodhimit të armëve duhet të plotësojnë disa kritere, mes të cilave, të kenë partneritet tregtar me shoqërinë shtetërore të prodhimit të armatimit ushtarak në Shqipëri dhe të investojnë se paku 25 milionë euro.
Por cilat janë lehtësitë që do të përfitojnë kompanitë që duan të prodhojnë armë në Shqipëri?
Veç procedurave të përshpejtuara për licencimin, lehtësitë parashikojnë që për 10 vitet e para të aktivitetit, ato do të paguajnë zero tatim-fitim, përjashtim nga taksa vendore dhe qendrore e pasurisë së paluajtshme për 10 vite, përjashtim nga të gjitha taksat doganore për mallrat që nevojiten për prodhimin e armatimit ushtarak e deri mbulim të shpenzimeve për energjinë, ujin dhe gazin për 10 vite.
Subjektet e licencuara duhet të sigurojnë një rezervë të caktuar armatimesh dhe pajisjesh tekonologjike ushtarake për Forcat e Armatosura të Republikës së Shqipërisë, në rastin e gjendjes së luftës ose në kushtet e një rreziku të afërt dhe konkret të një agresioni ndaj Shqipërisë.
Agjencia e Industrisë së Mbrojtjes do të mbajë një “listë të zezë” për subjektet që kanë cenuar sigurinë kombëtare dhe ndërkombëtare nëpërmjet veprimtarisë së tyre të prodhimit apo tregtimit të armatimit ushtarak. Masat ndëshkimore përfshijnë pezullimin ose revokimin e licencës, gjoba financiare, ndalimin e blerjes ose shitjes së armatimeve ushtarake dhe ngrirjen e aseteve financiare.