Edhe Fifi, ashtu si ne, po shpreson për një rikthim të Flori Mumajesit.
Në një intervistë të dhënë së fundmi për “Canape”, artistja është shprehur se i vjen keq që Flori nuk ka prodhuar muzikë të re dhe gjithashtu shprehet se nëse ai i rikthehet muzikës, të gjithë artistët e tjerë, duhet t’i ulen në gjunjë.
Ndërsa sa i përket marrëdhënies së tyre, Fifi tha se ka rreth një vit që i shkruan por nuk ka marrë kurrë një përgjigje nga ai.
“Për anën artistike ka qenë një mentor shumë i mirë, nuk mund ta lë kurrë anash pa e përmendur atë njeri. Më vjen shumë keq që nuk po sjell më këngë sepse është duke i munguar jashtëzakonisht shumë industrisë së muzikës. Unë vetëm di që nëse ai njeri rikthehet përsëri në skenë, ne të tjerët duhet të ulemi në gjunjë dhe të qajmë. Sepse i ka këngët fantastike. Plus kam një vit që nuk kam folur me të dhe nuk e di përse nuk kam folur. Po e them për herë të parë. Kam një vit që i shkruaj dhe nuk më ka kthyer përgjigje. Më vjen shumë keq që ai nuk përmendet aq shumë sa e meriton të përmendet.”– është shprehur ajo.