Media presitigjoze ”Reuters” ka analizuar në detaje kombëtaren shqiptare të futbollit dhe rrugëtimin e saj të cilën e konsideron si surprizën më të bukur të Kampionatit Europian. Shqipëria kthehet në shtëpi si skuadra e fundit e grupit të tyre në Euro 2024 me vetëm një pikë, por këto fakte nuk tregojnë asgjë për kontributin e saj të shkëlqyeshëm në këtë turne ku zhvilloi beteja të zgjarrta me tre prej skuadrave kryesore të turneut.
Në Gjermani gjithçka nisi me përballë kampionëve në fuqi, Italisë, për Shqipërinë. Trajneri brazilian Silvinjo nuk mund ta imagjinonte kurrë sa mirë do të fillonte turneu i dytë Europian në histori për “kuqezinjtë”.
Nga nisja e ndeshjes, Shqipëria bëri tre pasime, Italia gaboi nga rivënia dhe Nedim Bajrami përfitoi duke goditur topin, i cili përfundoi në rrjetë pas vetëm 23 sekondave lojë. Shqipëria vendosi rekord të ri sa i përket golit më të hershëm në fazën finale të kompeticionit.
Një gol që ndezi festën në mesin e dhjetëra mijëra tifozëve të veshur “kuqezi” në Dortmund, kaos në baret dhe shtëpitë e kryeqytetit shqiptar, Tiranë dhe një moment i pavdekshëm për kombin krenar ballkanik. Kundër Kroacisë në ndeshjen e radhës të Grupit B, Shqipëria i emocionoi sërish tifozët e saj pasi sfidoi dhe barazoi 2-2 me një gol në sekondat e fundit, në një nga ndeshjet më pulsuese të turneut deri më tani.
Shqiptarët u shfaqën më të përmbajtur në ndeshjen e tyre të tretë, në një humbje të ngushtë 1-0 ndaj Spanjës, por gjithsesi i dhanë kundërshtarëve të tyre shumë momente të pakëndshme nëpërmjet Jasir Asanit dhe Kristjan Asllanit. Federata ambicioze e futbollit e Shqipërisë shpreson që përvoja në Gjermani t’i ndihmojë për të ardhmen, me paraqitje më të rregullta.
Një gjë për të cilën mund të jenë të sigurt shqiptarët është mbështetja e jashtëzakonshme. Shumë ishin të befasuar kur panë shqiptarët në numër më të madh se italianët në ndeshjen hapëse, dhe kjo vazhdoi gjatë gjithë kohës, zhurma dhe ngjyra e tifozëve “kuqezi” përputheshin me numrin e madh të tyre. Disa erdhën nga shtëpia e disa të tjerë nga diaspora globale shqiptare.