Nancy Pelosi, një prej figurave më të rëndësishme në Partinë Demokrate në SHBA, tha të mërkurën në “Morning Joe” të MSNBC se ajo u ka kërkuar kolegëve të saj që të ndalonin të shprehnin vendimet e tyre ndaj kandidaturës së Presidentit, Joe Biden, deri pas samitit të NATO-s në Uashington DC, këtë javë.
Bashkëprezantuesi Jonathan Lemire e pyeti në mënyrë të drejtpërdrejtë: A ka Biden mbështetjen tuaj për të qenë kandidati i demokratëve?
Pelosi tha: “I takon presidentit të vendosë nëse do të kandidojë. Ne të gjithë po e inkurajojmë atë që të marrë atë vendim, sepse koha është e shkurtër. Mendoj se mbështetja dërrmuese e grupit parlamentar nuk më takon mua të them, nuk jam më kreu i grupit parlamentar por, ai është i dashur, ai respektohet dhe njerëzit duan që ai ta marrë atë vendim”.
Lemire tha, “ai ka thënë se e ka marrë vendimin. Ai ka thënë me vendosmëri këtë javë se do të kandidojë. Dëshironi që ai të kandidojë?”
Pelosi tha: “unë dua që ai të bëjë çfarëdo që do të vendosë të bëjë. Dhe kështu është. Çfarëdo që ai të vendosë, ne shkojmë me të. Mendoj se është vërtet e rëndësishme dhe do të shpresoja që të gjithë të bashkohen. Le të merret me këtë konferencë të NATO-s. Kjo është një punë shumë e madhe. Mbi 30 krerë shtetesh janë këtu. Ai është mikpritësi dhe organizatori, kjo do të thotë jo vetëm të presë, por do të thotë të orkestrojë diskutimin dhe të vendosë axhendën.
Dhe ai po e bën kaq madhështore. Dhe unë u kam thënë të gjithëve, le të ndalojmë çdo gjë që po mendoni. Ose tregojini dikujt privatisht, por nuk keni pse ta vendosni në tavolinë derisa të shohim se si do të shkojmë këtë javë. Por unë jam shumë krenare për presidentin”.