Beogradi mban sot një prej protestave më të mëdha të thirruara ndonjëherë nga opozita e vendit, e cila është kritikuar nga Presidenti Aleksandër Vuçiç, madje duke ngritur alarmin se do të ketë trazira dhe tentativë për grusht shteti.
Vuçiç tha se ka mësuar përmes kanaleve zyrtare nga Rusia se në Serbi po përgatiten trazira masive me qëllim një grusht shteti. “Ata që imagjinojnë se do të bëjnë diçka me forcë, nuk do ta bëjnë. Serbia po ecën pa pushim përpara, nuk mund dhe nuk do ta ndalin. Askush nuk do ta ndalojë më kurrë. Njerëzit nuk kanë nevojë të shqetësohen”, tha Vuçiç.
Liderët e opozitës serbe akuzojnë Vuçiç dhe Vueçeviçin se po vjellin vrer për popullin e thjeshtë dhe po i fryjnë zërave për një luftë civile. Nënkryetarja e Partisë Liri dhe Drejtësi (SSP) Marinika Tepiç deklaroi në platformën ‘X’ se në rrugë, në protestat kundër minierave të litiumit në të gjithë Serbinë, do të jenë “njerëzit më të ndershëm – fshatarë, punëtorë, intelektualë, sportistë…”
Kryetari i Partisë së Qendrës Serbe (SRCE) Zdravko Ponoš deklaroi se regjimi po flet për trazira dhe dhunë dhe po kërcënon me gjendje të jashtëzakonshme. “Për trazirat dhe gjendjen e jashtëzakonshme, qeveria mbështetet në falangën e (Sekretarit të Përgjithshëm të Qeverisë së Serbisë) Novak Nediç sepse nuk ka besim te policia. Njerëzit mbështeten te vetja për një shtet normal”, tha Ponoš.