Barcelona dhe Hansi Flick dhe tifozët “blaugrana” duhet të presin ende për të parë në aksion Dani Olmo. Mesfushori që shkëlqeu me kombëtaren e Spanjës në finalet e “Euro 2024” u ble nga Leipzig për 55 milion euro, por e kishte të pamundur të luante në javën e parë të sezonit të ri në La Liga.
Të njëjtin fat do të ketë edhe në ndeshjen e dytë, pasi klubi nga Katalonja nuk ka mundur ta federojë futbollistin. Shkak është situata e vështirë financiare, e krijuar nga borxhet e mëdha të akumuluar prej vitesh.
Sipas rregullores së “Fair Play Financiar”, Barcelona nuk mund të regjistrojë lojtarë të rinj, nëse bilanci nuk është i barabartë mes shpenzimeve dhe të ardhurave në arkën e klubit.
Kjo situatë u mendua se do të zhbllokohej me largimin e Ilkai Gyndogan, që liroi Barcelonën nga 20 milion euro në sezon. Por llogaritë nuk janë bërë mirë dhe për momentin, klubi “blaugrana” e ka të vështirë të federojë Dani Olmo. Duke qëndruar në atë që raportojnë mediat iberike, në rrezik është edhe operacioni për transferimin e Federiko Chiesa-s.