Presidenti i Ukrainës Volodymyr Zelensky tha sot se çfarëdo që Moska solli në vendin e tij, “tashmë është kthyer në shtëpinë e tyre”, ndërsa vendi sot shënon Ditën e Pavarësisë mes një inkursioni në rajonin Kursk të Rusisë.
“913 ditë më parë, Rusia nisi luftë kundër nesh, duke përfshirë edhe rajonin Sumy.
Ajo shkeli jo vetëm kufijtë tanë sovranë, por edhe kufijtë e mizorisë dhe sensit të shëndoshë. Përpiqej pafund për një gjë: të na shkatërronte”, tha Zelensky.
Në vend të kësaj, sot ne festojmë përvjetorin e 33-të të Pavarësisë së Ukrainës. Dhe çfarëdo që armiku ka sjellë në tokën tonë, tani është kthyer në shtëpinë e tyre”, tha Zelensky në një adresim me video nga rajoni kufitar Sumy.
Duke theksuar se hakmarrja e Ukrainës për konfliktin në vazhdim do të jetë “e denjë, simetrike, me rreze të gjatë”, Zelensky vazhdoi duke thënë se “Ata do ta dinë se herët a vonë, një përgjigje ukrainase do të arrijë në çdo moment në Federatën Ruse që është burim rreziku për jetën e shtetit dhe popullit tonë”.
Ai tha gjithashtu se Ukraina nuk do të lejojë që territori i saj të kthehet në një “zonë gri”, duke shtuar se presidenti rus Vladimir Putin “nuk do të na diktojë asnjë nga vijat e tij të kuqe”.
Komentet e Zelenskyt vijnë në mes të inkursionit të Kievit në rajonin kufitar të Rusisë, Kursk, i cili filloi natën e 5-6 gushtit kur forcat ukrainase hynë në qytetin Sudzha, rreth 10 kilometra nga kufiri.
Putin akuzoi Ukrainën për kryerjen e një “provokimi në shkallë të gjerë” dhe “të shtëna joselektive”, duke e përshkruar inkursionin si një “sulm terrorist”.
Ditë më vonë, Zelensky pranoi se ishte një “operacion” nga trupat ukrainase që synon të krijojë një “zonë tampon” kundër sulmeve ruse.