Deputeti socialist Erion Braçe shpreh revoltën e tij për sherrin masiv që ka ndodhur dy ditë më parë në Palasë, ku disa të rinj janë rrahur dhunshëm me njëri-tjetrin, teksa ndodheshin në një lokal buzë detit. Ai i bën thirrje qeverisë së tij që të merren me këta persona.
Sipas Braçes, këta persona që pretendohet të jenë “VIP-a” në fakt janë llumi i shoqërisë që shkojnë në këto zona bregdetare vetëm për të treguar pushtetin e parave të tyre kriminale, të pakontrolluara nga autoritetet.
“Së pari, pastroni mjediset publike nga këta. Ata nuk janë atje për pushime, por për të imponuar statusin e tyre si ‘VIP’. Këta dhe ato që i shoqërojnë nuk mund të kenë vend në mjediset tona. Së dyti, pastroni sektorin e shërbimeve nga ky model biznesi, i cili në shumicën e rasteve është informal. Ky është biznesi që tërheq këtë lloj njerëzish dhe paratë e tyre të pista. Unë respektoj çdo individ që punon në bregdet për njerëzit e zakonshëm, që synon klientelë normale dhe respekton buxhetet e tyre, duke ofruar qetësi, argëtim dhe siguri. Ky është ambienti ynë,” thekson Braçe.
Së treti, Braçe kërkon që të gjithë – policia, hetuesit, prokurorët, gjyqtarët dhe ata që merren me pasuritë e politikanëve – të veprojnë edhe ndaj parave të pista të këtyre individëve. “Pa para, këta nuk janë asgjë, zero,” shton ai.
Deputeti socialist i bën thirrje qeverisë: “Merruni një herë të vetme seriozisht me këta, jo vetëm kur përplasen në publik! Është gjëja më e thjeshtë: këta nuk duhet të kenë vend në mjedisin publik!”