Pagat minimale dhe maksimale për punonjësit e pushtetit vendor do të rriten nga 40% deri në 120%. Ministri i Shtetit për Pushtetin Vendor, Arbjan Mazniku thotë se reforma e pagave është shumë e rëndësishme për pushtetin vendor. ”Reforma njëson klasifikimin e pozicionin e punës me administratën qendrore, duke i rritur pagat në mënyrë domethënëse”, tha Mazniku.
Për më tepër, ministri theksoi se profesionistët do të paguhen njësoj pavarësisht madhësisë së bashkisë ku punojnë. ”Do të riorganizohet struktura e bashkive duke sjellë më shumë cilësi shërbimesh për qytetarët. Stafet e bashkive do të rikonstruktohen në mënyrë që të kenë shërbime më të mira dhe cilësore për qytetarët”, tha Mazniku.
Bashkë me rritjen e pagave edhe vjetërsia e punës do të llogaritet njësoj si punonjësve të administratës qendrore. Qeveria miratoi në 1 gusht rritjen e pagave për punonjësit në të gjitha bashkitë e vendit. Vendimi parashikon që të gjitha pagat e pushtetit vendor do të unifikohen në të gjitha bashkitë dhe do t’i japë mundësi bashkive të tërheqin nga tregu profesionistë duke kontribuar në mënyrë efikase.