Partia Demokratike, përmes Sekretarit për Çështjet Zgjedhore, Ivi Kaso thotë se Rama po kthen votimin monist, duke falsifikuar procesin me kandidatë false e të paligjshëm nga Bindja Demokratike.
Sipas Ivi Kasos, Kuvendi ka lëshuar vërtetim false sikur kjo parti përfaqësohet prej 6 muajsh në Kuvend, kur deputeti ka më pak se një muaj që ka marrë mandatin. “Sipas ligjit që një kandidat i një partie politike të regjistrohet nga KZAZ dhe KQZ në zgjedhje, duhet të paraqesë një vërtetim që partia politike zotëron një mandat deputeti të paktën 6 muajt e fundit. Në të kundërt, duhet të mbledhë firma nga votuesit e secilës zonë, ku kandidon. Në një akt të paprecedentë, për llogari të Edi Ramës, Sekretari i Përgjithshëm i Kuvendit ka falsifikuar dokumentet zyrtare, duke lëshuar për partinë fantazëm të Edi Ramës një vërtetim, sikur përfaqësohet në Kuvend nga një deputet që ka 6 muaj që ushtron mandatin e tij. Bëhet fjalë për deputetin Andi Përmeti, i cili nuk ka mbushur as 1 muaj në marrjen e mandatit”, tha Kaso në një deklaratë për mediat.
Duke paraqitur dhe dokuementet ai thotë se PD ka paditur për shpërdorim detyre Sekretarin e Përgjithshëm të Kuvendit. “Çdo anëtar i KQZ dhe KZAZ do të mbajë përgjegjësi penale për çdo shkelje të ligjit me kandidatë të regjistruar me dokumente fallco”, tha ai.
Ndërkaq, Ivi Kaso do të shkojë në KQZ, bashkë me përfaqësuesin e LSI, për të dorëzuar listën e anëtarëve të opozitës në KZAZ.