Kryeministri Edi Rama ka zhvilluar sot pasdite në selinë e Partisë Socialiste një takim me disa të rinj që kanë aplikuar në platformën “Deputeti që duam”.
Mes tyre ishte edhe një nënë e re me origjinë nga Gjirokastra, që jeton prej 14 vitesh në Athinë. Ajo quhet Aida Kasapi dhe është vajza e mjeshtrit të cirkut, Miço Kasapi, sakaq mamaja është një mjeke stomatologe me reputacion në qytetin e gurtë.
Gjatë fjalës së saj, ajo shpjegoi arsyet përse kërkon të bëhet deputet teksa nuk i kurseu vlerësimet dhe falenderimet për kryeministrin Edi Rama.
“Kryeministri Edi Rama është i vetmi njeri që është himni ynë i rrugës për në Bashkimin Europian. Krenar për kryeministrin e Shqipërisë Edi Rama. Ju na bëni krenarë ditë për ditë”, tha Aida Kasapi.
Nuk dihet nëse ajo do të përzgjidhet si kandidate për deputete dhe do të kandidojë në Gjirokastër apo në ndonjë qark tjetër pasi mendohet të ketë rivalitet deri në momentin e përzgjedhjes së kandidatëve.