Serbia do ta shpallte Kosovën një tokë të pushtuar, por presidenti Aleksandër Vuçiç është trembur nga ekspertët e tij juridik. Vuçiç pretendon se po ta shpallte një territor të pushtuar, grupet e armatosura në Kosovë, pavarësisht statusit të tyre, do të merrnin statusin e forcës së armatosur të ligjshme.
“Ne nuk do t’u japim atyre asnjë legjitimitet”, tha presidenti serb. Në konferencë prezantoi 7 pika të planit të tij kundër shtetit të Kosovës, të cilat do t’ia paraqesë, siç tha, mbi 60 liderëve të botës. Konkretisht kërkoi kthimin e gjendjes në Kosovë siç ishte përpara se Albin Kurti të vinte në pushtet: 1, mbajtja e zgjedhjeve lokale në veri; 2, zbatimin e nenit 9 të marrëveshjes së parë të Brukselit për kthimin kolektiv të serbëve në Polici; 3,Kthimi i gjyqtarëve dhe prokurorëve serbë në funksione gjyqësore; 4, tërheqjen e forcave speciale të policisë së Kosovës në veri dhe mbylljen e të gjitha institucioneve që ofrojnë shërbime jetike publike për qytetarët; 5, formimi urgjent dhe përfundimtar i Asociacionit; 6, lirimin e menjëhershëm të të gjithë të burgosurve politikë, që u arrestuan në protesta dhe barrikada; 7, mundësimi i menjëhershëm i transaksioneve të pandërprera të pagesave dhe shërbimeve postare në monedhën dinar.
Vuçiç njoftoi se parlamenti, brenda 45 ditësh, do të miratojë një ligj, me të cilin do të shpallet paligjshmëria e të gjitha organeve dhe institucioneve të themeluara në territorin e Kosovës dhe Metohisë, siç e quan ai, pas shpalljes së paligjshme të pavarësisë. “Ata mund të ëndërrojnë për pavarësinë e tyre. Dhe ata mund të ëndërrojnë anëtarësimin në OKB dhe mund të ëndërrojnë kështu për dhjetëra vite”, pretendoi presidenti serb.