Deputetja e PS-së, Ermonela Felaj është në listën e hapur të socialistëve për zgjedhjet parlamentare të 2025. Ajo thotë se nuk ndjehet e rrezikuar, pasi sipas saj mandati nuk është i përjetshëm, edhe pse është një privilegj që pak vetëve u jepet në jetë.
Lista dhe formula e re sipas Felajt, bëhet me qëllim maksimizimin e fitores së socialistëve, të cilët kërkojnë një mandat të katërt qeverisës, por edhe për harmonizimin e forcave sipas nevojave. Felaj thekson në A2 se duhet t’u jepet mundësia edhe të rinjve për riienergjizimin e partisë.
“Një arsye kryesore është që PS kërkon mandatin e katërt dhe kjo nuk është e thjeshtë. Kërkon rinovim të forcave ne nuk i kemi ndezur motorët tani dhe ky rienergjizim përfshin edhe pjesën drejtuese të PS.
Unë jam bërë aktive në 2009 dhe në atë kohë PS ndërroi 40% të anëtarëve dhe nuk e shoh me paragjykim këtë pjesë se do ishte ironike dhe hipokrite nga ana ime, se unë vetëm jam produkt i një rinovimi. Duhet t’u jepet mundësia edhe të rinjve.
Listat e formula e lejon harmonizimin sipas nevojave. Sistemin dhe hartimin e listave duhet ta bësh në mënyrë të tillë që të maksimizosh fitoren. Në 2021 drejtuesit politikë u renditën në fund të listës dhe ideja ishte që të energjizonin pjesën e parë të listës për të marrë më shumë vota”.