”Izraeli po e zhyt Lindjen e Mesme në luftë totale”,-thotë qeveria në Liban, pas valës së bombardimeve nga ushtria e Izraelit që pretendon se shënjestroi Hezbollahun. Bilanci i viktimave është përkeqësuar në Bejrut, ku raportohet për mbi 31 persona të vrarë, përfshirë tre fëmijë dhe shtatë gra.
Organizata që mbështetet nga Irani, konfirmoi humbjen e 16 anëtarëve, prej të cilëve dy komandantë të lartë të Hezbollahut. Ushtria izraelite njoftoi se në shënjestër të sulmit ishte njësia elitare Radwan, një grupim i mbështetur nga Irani që vepron në Liban.
Forcat izraelite bëjnë të ditur se sulmet në shtetin fqinj nuk do të ndalen. Po ashtu nuk kanë rreshtur as raketat e lëshuara nga Hezbollahu, me mbi 140 të tilla në orët e fundit. Pavarësisht frontit të ri, ushtria e shtetit hebre nuk ka ndalur bombardimet në Gaza.