Kryetari i bashkisë së Maliqit, Gëzim Topçiu në emisionin “Vendi Im” nga Edlira Prendi, rrëfen se duhet më shumë mbështetje për fermerët. Ai shpjegon se ndoshta një skemë e re subvencionimi do t’iu vinte në ndihmë sidomos atyre që merren me blegtori.
“Ka probleme në skemën e bujqësisë edhe pse kanë filluar të marrin subvencione të naftës apo të të gjithë inputeve të tjera bujqësore. Ka një vështirësi në dhënien e këtyre financimeve apo subvencioneve në momentin e duhur kur fermerëve iu nevojiten. Ajo që fermerët kanë ngritur shqetësim ka të bëjë me skemën e subvencioneve që duhet të ndryshojë. Dhe ata kanë hedhur idenë që duhet të ecim me eksperiencën e vendeve të rajonit për skemën e subvencioneve. Blegtoria kërkon një subvencion më të madh. Kërkon një subvencion më të madh për krerë apo një pjesë e blegtorëve e kërkojnë për litër qumësht”,-shpjegon kryebashkiaku i Maliqit.
Këtë vit fermerët e Maliqit dolën disa herë në protestë duke bllokuar edhe rrugët më traktorë për të kërkuar mbështetje nga qeveria pasi sipas tyre kostot e prodhimit janë më të larta se çmimi me të cilin tregtarët ua blenë produktet.