Një ish-Miss Arjola Demiri, e pasi përfundoi Universitetin e Arteve në Tiranë, të vetmet “vepra” që kishte, ishin tre fëmijët e saj që erdhën në jetë nga martesa e dështuar.
Pasi i rriti, nisi një jetë të re në Prishtinë. Arjola Demiri vendosi t’i hyjë seriozisht profesionit të aktores me vënien në skenën shqiptare në Tiranë të shfaqjes “Dashuritë e virgjëreshës Madalenë”, e autorit Ridvan Dibra, me regji të Ben Apollonit.
E vetme në skenë, pas bujës që bëri në Tiranë, ajo u rikthye në teatrin “Dodona” në Prishtinë për të rrëfyer historinë e Madalenës në tri etapa të jetës së saj; etapa kyçe në jetën e një femre. Shfaqja është plot situata komike, dramatike e tragjike që aq sa e bën publikun të qeshë, po aq e bën të reflektojë apo përlotet.
Me interpretimin e saj plot finesë, Arjola mund të themi se theu një tabu, duke arritur të improvizojë një skenë masturbimi në skenën e teatrit, moment që ajo e cilësoi në media “shumë elegant” për t’u parë pa asnjë lloj sikleti, edhe pse ndodh live.