Një parti sllovene ultra-nacionaliste me emrin Liga Nacionale, ka nisur fushatën për zgjedhjet e Parlamentit Europian, ku pozicionohet kundër shqiptarëve që jetojnë në këtë shtet.
“Këtu është Slloveni e jo Shqipëri”, është slogani i tyre që shfaqet në bilbordera në disa qytete. Liga Nacionale kundërshton idenë që të rinj shqiptarë nga Kosova dhe Shqipëria të gjejnë mundësi punësimi e strehimi në Slloveni, kur këto dy vende të bëhen pjesë e Bashkimit Europian.
“Ne nuk duam të bëhemi të huaj në vendin tonë. Këtu është Slloveni dhe jo Shqipëri, siç edhe të jepet përshtypja kur kalon nëpër qytetet e Kranjes dhe Velenjes”, shkruan në një nga deklaratat e kësaj partie në faqen zyrtare në Facebook.
Liga Nacionale është edhe kundër emigrantëve nga vende të tjera, sidomos nga vendet arabe, që mund të kenë gjetur leje qëndrimi në Slloveni.
