Kristiano Ronaldo festoi mbrëmjen e djeshme sëbashku me ekipin trofeun titullit kampion. Pas trofeut të Superkupës kjo ishte hera e dytë për luzitanin të festonte si bardhezi, megjithatë titulli i Serisë A ka një rëndësi më të veçantë. Një pjesë e madhe e suksesit i takon portugezit, i cili është golashënuesi më i mirë i ekipit duke i udhëhequr bardhezinjtë drejt triumfit të tetë radhazi në kampionat.
Ndërkaq, Ronaldo provon edhe njëherë tjetër se është i aftë të triumfojë kudo që luan dhe 34-vjeçari u pa i emocionuar në festën e titullit teksa nuk e lëshonte për asnjë moment Kupën nga duart duke shkrepur foto të panumërta me trofeun.
Në një nga këto raste, Ronaldo është fokusuar nga kamerat teksa ka goditur pa dashje djalin e tij, Kristiano Xhunio, i cili megjithatë nuk u ankua, teksa CR7 i kërkoi falje. Por, Ronaldo sërish u shpërqendrua dhe këtë herë Kupa goditi të fejuarën, Xhorxhina. Megjithatë, këto incidente të vogla nuk prishën festën e Ronaldos me trofeun në duar.