E mërkura në mbrëmje mes FSHF-së dhe KF Tiranës ka qenë e nderë. Në pak orë është vendosur dita dhe orari i sfidës mes Laçit dhe bardhebluve. Gjithsesi, në prapavijë ka pasur përplasje të forta mes zyrtarëve të të dyja palëve. Në fillim është vendosur që ndeshja të luhej të premten, por FSHF e shtyu takimin me 24 orë.
Tirana nga ana e saj është rebeluar dhe ka kërkuar të luhej ditën e premte, duke i bërë me dije institucionit të futbollit se nëse ndeshja spostohet të shtunën nuk do ta luajë fare. Nga ana tjetër, sektori i garave i ka bërë me dije Tiranës, që nëse nuk paraqitet të shtunën në ndeshje duhet të mbajë pasojat dhe do të ndëshkohet rëndë. Pas kërcënimit, bardheblutë janë ulur dhe sot paradite kanë zyrtarizuar takimin.
TIFOZËT – Si të mos mjaftonte momenti jo fortë pozitiv i rezultateve, Tirana është e detyruar të shtegtojë sa në një cep në tjetrin, për t’i luajtur ndeshjet si skuadër pritëse.
Për këtë fakt, grupimi “Tirona Fanatics” ka reaguar shumë ashpër. “Turpi i radhës vazhdon. Nuk mundet, që klubi më i titulluar në Shqipëri edhe identiteti i kryeqytetit të luajë sa nga një cep në cepin tjetër vetëm se F$HF ruan me idiotizëm “barin” e stadiumit kur bëhet fjalë për futboll. E për tallavatë e koncertet e turpit nuk ka kurrë kufizim, a thua se kemi të bëjmë me një sallë eventesh që merret me qira e jo me një stadium futbolli të ngritur për futbollin.
Gjendja me stadiumin “Selman Stërmasi” është akoma më e turpshme ku ambienti është kthyer tërësisht në një sallë dasmash e ku ping-pongu i përgjegjësisë që luhet midis përgjegjësve, tregon dhe njëherë amatorizmin e thellë ku është zhytur klubi ynë tashmë prej vitesh e urrejtjen e F$HF që luan pjesën e vet të pafytyrësisë kudo ku ka mundësi. Durimi ka një kufi dhe kjo gjendje turpi nuk mund të vazhdojë përgjithmonë.
Ne do të jemi aty, kudo për Tiranën, si, kur luajmë në kryeqytet ashtu dhe kur luajmë në Gjeorgjinë e largët, më shumë se për të parë estradën tuaj amatore e të shitur për t’ju treguar si gjithmonë se kurrë nuk mund të luani me të”, shkruanin “Fanatics”, të cilët nuk kanë kursyer edhe presidencën e klubit duke e etiketuar të skaduar.