Kryeministri Edi Rama nga New York-u, tha se në listën e PS-së për zgjedhjet e 2025, do të ketë në të gjitha qarqet kandidatë për deputetë që janë shqiptarë që jetojnë në emigracion.
“Të jeni të sigurt se në listën e deputetëve për zgjedhjet e ardhshme, do të gjeni në të gjitha qarqet, edhe shqiptarë që janë sot në emigracion. Ju takon ju që të jepni mbështetjen me votë”,-deklaroi Rama teksa i përgjigjej një prej pyetjeve të marra nga salla.
Rama kujtoi se qeveria që ai drejton ka hapur po ashtu një platformë “Deputeti që duam” ku të gjithë ata që kanë shprehur interesin për të kandiduar mund të përfshihen. Kryeministri i përsëriti thirrjet që diaspora të votojë në këto zgjedhje në mënyrë, që siç u shpreh ai, Shqipëria të mos bëjë hapa pas.
“Shqipëria ka nevojë për ju më shumë seç keni ju nevojë për të, sepse Shqipëria është si ju. Dhe është sot në atë fazën që keni kaluar ju kur erdhët këtu dhe e nisët nga hiçi”.