Reperi i njohur Noizy ka anuluar turin që kishte planifikuar të bënte në SHBA, për shkak të problemeve me vizën.
Me anë të një foto të publikuar në InstaStory, Noizy u ka kërkuar ndjesë të gjithë dashamirësve të tij, duke theksuar se nuk do të ketë mundësi të jetë pranë tyre këtë herë.
“U kërkoj falje të gjitha fansave të mi në SHBA. Nuk mund të vij kësaj here. Ambasada amerikane po ma vështirëson këtë. Nuk e kuptoj, por çka është, është. Për shkak se u arrestova muajin e kaluar, më kanë revokuar vizën amerikane,” shkroi reperi.
Arrestimi i Noizy-t ndodhi në Shëngjin më 7 gusht të këtij viti pas një urdhri të autoriteteve kosovare, i akuzuar për plagosje të rëndë në një klub nate në Pejë. Në pranga bashkë me Rigels Rajkun ra edhe miku i tij Bahtjar Bajraktari i njohur si DJ Crax
Reperi më pas u ekstradua në Kosovë, ku kaloi disa ditë në paraburgim.