Shtetet e Bashkuara njoftuan ditën e sotme një paketë të re ndihme ushtarake prej 425 milionë dollarësh për Ukrainën, në një kohë kur Uashingtoni akuzon Korenë e Veriut se ka dërguar trupa në Rusi për të luftuar në frontin ukrainas.
Kjo paketë e re, e shpallur përpara zgjedhjeve presidenciale në SHBA, përfshin pajisje të mbrojtjes ajrore, municione artilerie, automjete të blinduara dhe armë antitank, sipas Departamentit të Mbrojtjes.
Këto armë vijnë nga stoqet tashmë ekzistuese të ushtrisë amerikane.
Uashingtoni “do të vazhdojë të punojë për të përmbushur nevojat urgjente që ka Ukraina në fushën e betejës për t’u mbrojtur kundër agresionit rus”, tha Pentagoni në një deklaratë.
SHBA-ja është mbështetësi kryesor i pajisjeve ushtarake të Kievit, pasi ka dhënë më shumë se 60 miliardë dollarë ndihmë ushtarake që nga fillimi i luftës në shkurt 2022.
Të martën, më 5 nëntor, amerikanët shkojnë në kutitë e votimit për të zgjedhur presidentin e tyre të ardhshëm midis demokrates Kamala Harris dhe Republikanit Donald Trump. Ish-presidenti Trump ka shprehur hapur dyshimet e tij për vazhdimin e ndihmës amerikane për Ukrainën.