Skandal në qytetin e Burrelit. Partia Demokratike Mat dhe bashkia shpërndajnë ndihma humanitare vetëm për militantët e kësaj partie. Ajo që bie në sy është fakti që ndihmat në muajin e Ramazanit nuk shpërndahen për njerëzit në nevojë, por listat hartohen në zyrat e degës lokale të PD-së Mat.
I deleguari i Partisë Demokratike Kreshnik Çollaku tha se ai ishte personi që po i shpërndante këto ndihma humanitare, ndërkohë që në krah kishte kryetarin e bashkisë Mat, Nezir Rizvani. Burime pranë kësaj njësie bëjnë me dije se listat nuk u hartuan nga kryetarët e fshatrave por nga dega lokale e PD Mat, nga Çollaku dhe Rizvani.
Stafi i kandidatit socialist për kryetar bashkie kritikon këtë veprim të ulët të drejtuesve të Partisë Demokratike që gabojnë rëndë në dy drejtime, shpërndajnë ndihma gjatë fushatës elektorale për militantët e tyre dhe së dyti abuzojnë me njerëzit në nevojë pikërisht në muajin e madhnueshëm të Ramazanit.