“Përgjegjës zyrtar për sulmin në kanalit të ujit në Zubin Potok është Beogradi”,-tha ministri i Brendshëm i Kosovës, Xhelal Sveçla në një konferencë. Ai tha se kemi të bëjmë me një grup profesional të mirëorganizuar teksa shtoi gjithashtu se për rastin janë vënë në pranga tetë persona të dyshuar.
“Pas hetimeve intensive, sot në orët e mëngjesit në 10 lokacione kemi realizuar kontrolle, ku janë arrestuar 8 persona të dyshuar në stacion policor si të dyshuar për përfshirje në veprime kriminale dhe terroriste. Kontrolli është realizuar në bashkëpunim me organet e drejtësisë dhe AKI-në”.
Sveçla sulmin e cilësoi si më të rëndin të kryer ndaj infrastrukturës kritike të Kosovës që nga përfundimi i luftës. ”Ky sulm terrorist nuk është vetëm një sulm i rëndomtë por është një sulm i organizuar nga grupe apo organizata që janë profesioniste në organizimin e sulmeve të tilla që janë terroriste. Synimi i tyre ka qenë të maksimalizohet dëmtimi në dëm të shtetit të Kosovës dhe qytetarëve të saj.”
Nga kontrollet e kryera është sekuestruar një arsenal armësh, municione si dhe lëndë shpërthyese. Për goditjen e kanalit, siç u bë e ditur, është vendosur në një çantë të zezë të paktën 15-20 kg lëndë plasëse, që është aktivizuar me detonator mekanik.