Karabinierët italianë arrestuan për herë të dytë në pak muaj një shqiptar në zonën e Lucca.
I riu akuzohet për vjedhje banesash dhe dyshohet si pjesë e një grupi “skifterësh” që operonte në zonë, teksa provat e lidhin atë me një rast në komunën Pietrasanta, e ndodhur më 31 maj 2024.
Në atë kohë, shqiptari së bashku me tre bashkëpunëtorë që ishin kapur më parë, kishin hyrë në një shtëpi gjatë natës dhe pasi plaçkitën dhomat e gjumit, arritën të gjenin një kasafortë, duke e thyer atë. Brenda morën bizhuteri dhe tre pistoleta me municion. Tre u kapën gjatë ndjekjes, por më parë të rinjtë kishin asgjësuar provat dhe ua kishin dhënë bashkëpunëtorëve, kurse shqiptari i ndaluar dje (11 Dhjetor), mundi të ikte.
Pasi karabinierët kryqëzuan informacionet, zbuluan se grupi vepronte edhe në Lancia, Versilia dhe Piza. Tani shqiptari është ndaluar për herë të dytë, që lidhen me episodet e reja dhe gjurmët që janë gjetur nga hetuesit.
Por ai është një emër i njohur për drejtësinë italiane, ndaj edhe Gjykata aprovoi masën “arrest me burg”, për shkak se ekzistonte rreziku i përsëritjes së krimit.
Edhe në 9 Tetor 2024 ai ishte arrestuar për bashkëpunim në një tentativë vrasjeje kundër një mareshali të policisë, gjatë një arratisjeje të guximshme pas një tentative vjedhjeje në Versilia. Personi i arrestuar është dërguar në burgun e La Spezia-s dhe vijojnë hetimet.