Teatri i Kukullave në Sheshin “Skënderbej”, është restauruar totalisht dhe ka hapur dyert për të gjithë vogëlushët me shfaqje të reja dhe emocionuese. I pranishëm ditën e sotme në përurimin e Teatrit ishte kreu i qeverisë Edi Rama, së bashku me ministrin e Ekonomisë, Kulturës dhe Inovacionit, Blendi Gonxhja.
Edi Rama: Kjo godinë ka një histori, ka një arsye të rëndësishme për tu mbajtur dhe për gjithë këtë investim që u bë. Unë besoj që ky teatër ka një rëndësi të posaçme dhe për faktin që në përgjithësi qytetet sot, vendet sot dhe zhvillimi i infrastrukturës dhe i qyteteve vihet në funksion të të gjithëve, por gjihtmonë pjesa më problematike është pjesa e fëmijëve. Ata që janë më pak të përfshirë në zhvillim janë fëmijët. Bëhen ndërtime të bukura, hotele, resorte, bëhen zyra, por ajo që ju mbetet fëmijëve është gjithmonë shumë pak.
Për këtë arsye është gjithmonë më shumë se sa një godinë, më shumë se sa një vepër kur diçka më shumë shtohet në funksion të fëmijëve. Më vjen shumë mirë që kjo derë u hap. Po punojmë çdo ditë që së shpejti të hapim edhe derën tjetër, të teatrit të madh të fëmijëve. Do të vijojmë përpjekjet që të krijojmë sa më shumë hapësira dhe të hapim sa më shumë dyer për fëmijët e kryeqytetit dhe fëmijët në gjithë Shqipërinë.