Raporti i veprimtarisë vjetore të Institutit të Studimeve të Krimeve dhe Pasojave të Komunizmit ka sjellë debate në seancën parlamentare të kësaj të enjte.
Kreu i këtij institucioni, Agron Tufa parashtroi analizën vjetore dhe kërkesat e Institutit. Pas prezantimit të Tufës, deputeti socialist Spartak Braho e akuzoi Institutin si celulë të Ballit Kombëtar. “Celulë të Ballit Kombëtar jo vetëm se jeni mbledhur aty, po po luani me zjarrin duke shkelur ligjin dhe shpërdoruar Luftën NAÇL, të cilën nuk e bëtë ju”, tha Braho.
Kaq ka mjaftuar që të shpërthejë keq kreu i Ballit Kombëtar Adriatik Alimadhi i cil e ka etiketuar “budalla” Spartak Brahon. “Të biem kaq poshtë në nivelin e këtij budallai këtu (për Spartak Brahon) ju thoni ballistët hanin pula, po ju keni ngrënë koka njerëzish mo, keni vrarë 4 mijë deri në 6 mijë shqiptarë, po ju nuk dini asgjë nga historia, qëllimisht nuk e lejoni historinë, qëllimisht e pyeta z. Tufa a keni mundësi ose studime të nevojshme për ta shtrirë aktivitetin e studimit të këtij instituti të dobishëm për historinë shqiptare”, tha Alimadhi.
Braho për Tufën
Braho akuzoi më tej Agron Tufën se nuk disponon certifikatë sigurie ndërkohë që kërkon informacione që janë ende të padeklasifikuara. Braho i kërkoi Kuvendit mjetet ligjore për një konceptim dinjitoz e të mirëfilltë shkencor. “Ndërsa ju zoti Tufa për shkelje të rënda të ligjit duhet të planifikoheni e kontrolloheni nga drejtoria e monitorimit të Kuvendit të Shqipërisë dhe mendoj se detyrën si drejtor ekzekutiv ta lini si të papërshtatshme”, tha Braho.