Lista Serbe reagoi pas mbylljes së zyrave të Administratës Tatimore të Serbisë që funksiononte në veri të Mitrovicës si dhe kompaninë e sigurimeve nga Serbia, ‘Dunav Osiguranje’, nën arsyetimin e autoriteteve të Kosovës se këto institucione punonin pa licencë.
Partia më e madhe e serbëve në Kosovë, e cila gëzon mbështetjen e Beogradit zyrtar, pretendon se pas këtyre lëvizjeve, “80 punëtorë kanë mbetur në rrugë”. Ajo u shpreh se do të bisedojë mbi mundësitë e ndihmës dhe mbështetjes për ta. “Asnjëri prej tyre nuk do të mbetet pa paga dhe të ardhura dhe ekzistenca e tyre do të mbetet e siguruar. Me nxjerrjen në rrugë të 80 punëtorëve serbë, Albin Kurti vazhdoi fushatën e tij parazgjedhore, të cilën e drejton ekskluzivisht mbi kurrizin e popullit serb, sepse nuk ka çfarë t’u ofrojë votuesve tij”, thuhet në reagimin e Listës Srpska.
Vetëvendosja vazhdon të këmbëngulë në çdo formë që Lista Serbe të mos lejohet të marrë pjesë në zgjedhjet e 9 shkurtit, me argumentin se ajo “është angazhuar në akte terroriste në Kosovë”. Këtë e pohoi një ditë më parë përmes kabinetit të saj edhe Presidentja e Kosovës, Vjosa Osmani e cila vlerëson se “Lista Serbe është e angazhuar në akte terroriste, akte agresioni dhe cenim të rendit kushtetues”. Prandaj sipas Presidentes ajo beson se “KQZ-ja duhet të vendosë në mënyrë të pavarur”.
Megjithatë Komisioni Qendror i Zgjedhjeve tashmë ka certifikuar listën Srpska dhe ajo do të jetë pjesë e garës zgjedhore dhe u përfshi në fletëvotim.