Që në orët e para të mëngjesit, vendi ynë do të mbizotërohet nga moti i kthjellët dhe vranësira të lehta e kalimtare, ku më të theksuara kthjellimet do të jenë përgjatë Ultësirës Perëndimore. Ndërkohë, zonat malore përgjatë shtrirjes lindore përveç kthjellimeve do të kenë vranësira disi më të shpeshta. Ky stabilitet i atmosferës do të na shoqërojë edhe gjatë natës.
Temperaturat e ajrit do të pësojnë rritje si në vlerat e mëngjesit dhe të mesditës duke luhatur vlerat ditore nga -4°C vlera minimale e shënuar në qytetin e Bajram Currit deri në 14°C vlera maksimale e cila pritet në Fier dhe Divjakë. Era do të fryjë e lehtë dhe mesatare si në tokë dhe në det me shpejtësi mbi 30 km/h nga drejtimi permanent Verilindor, duke krijuar në brigjet detare dallgëzim 1- 2 ballë.
Kosova
Përgjatë gjithë 24-orëshit, republika e Kosovës do të jetë nën dominimin e masave ajrore të qëndrueshme duke sjellë dominim të motit të kthjellët. Gjatë pasdites, do të ketë vranësira të lehta e kalimtare në shumë zona të Kosovës, por nuk priten reshje. Përgjatë luginave do të ketë mjegull të dendur në orët e para të mëngjesit. Ndërkohë temperaturat e ajrit do të pësojnë rritje si në vlerat e mëngjesit dhe të mesditës duke luhatur vlerat ditore nga -5°C minimalja e shënuar në qytetin e Mitrovicës deri në 6°C vlera maksimale e cila do të shënohen në Gjakovë. Për sa i përket parametrit të Erës do të fryjë mesatare gjatë gjithë ditës me shpejtësi mbi 35 km/h nga drejtimi permanent Verilindor.
Maqedonia e Veriut
Nën mbizotërimin e motit të kthjellët dhe relativisht të ftohtë do të paraqitet republika e MV gjatë gjithë paradites por orët e pasdites dhe në vijim do të sjellin vranësira të lehta e kalimtare në pjesën më të madhe të MV, më të fokusuara në zonat veriore dhe verilindore, megjithatë nuk priten reshje. Temperaturat e ajrit do të pësojnë rritje si në vlerat e mëngjesit dhe të mesditës duke luhatur vlerat ditore nga -4°C vlera minimale deri në 6°C vlera maksimale në rang territori. Era do të fryjë e lehtë gjatë gjithë ditës duke arritur shpejtësinë maksimale deri në 30 km/h nga drejtimi Verilindor.
Evropa
Brigjet veriore dhe verilindore të Europës do të përfshihen nga vranësira duke sjellë reshje të dendura dëbore dhe temperatura mjaft të ulëta. Po ashtu, ishujt Britanikë do të përfshihen vranësira dhe reshje shiu, ku herë pas here do të jenë në formë shtrëngate ndërsa pjesa më e madhe e kontinentit Europian do të mbizotërohet nga masa ajrore të qëndrueshme me origjinë kontinentale duke sjellë mot të kthjellët dhe temperatura relativisht të ulëta.