Në mbledhjen e sotme Komisioni i Posaçëm Parlamentar për Reformën Zgjedhore, miratoi kalendarin e punimeve, duke vendosur se gjithçka lidhur me reformën do të jetë mbyllur deri më 28 nëntor.
Dy bashkëkryetarët Damian Gjiknuri dhe Rudina Hajdari miratuan sot kalendarin për periudhën maj-nëntor 2019.
Vendimet e mbledhjes
Komisioni u dakordësua që brenda 31 Korrikut të ketë përfunduar dhe miratuar ndryshimet në kuadër të rekomandimeve bazë të OSBE/ODIHR-it.
Brenda 30 Shtatorit do të përmbyllet shqyrtimi i çështjes së votës së emigrantëve dhe teknologjitë e reja në procesin e votimit.
Sipas kalendarit, deri në 31 Tetor komisioni do të ketë një produkt për çështjen e financimit të partive politike.
Brenda 28 Nëntorit, komisioni do duhet të ketë përmbyllur edhe diskutimet mbi çështjen e sistemit zgjedhor.
Gjithashtu, deputetët u dakordësuan që brenda muajit Korrik të hapen konsultimet publike për çështjen e sistemit zgjedhor, nëpërmjet një tryeze gjithëpërfshirëse me
pjesëmarrjen e partive politike, partnerëve ndërkombëtar, shoqërisë civile dhe gjithë aktorëve të interesuar.