Në kuadër të përgatitjeve për edicionin e ri kualifikues të Kupës së Botës, trajneri i kombëtares shqiptare të futbollit, Sylvinho, së bashku me stafin e tij teknik, Doriva dhe Zabaleta, po vijojnë turin e vëzhgimeve dhe takimeve me futbollistët shqiptarë që luajnë në kampionatet europiane.
Këtë herë, stafi kuqezi ka udhëtuar drejt Anglisë, ku ka ndjekur nga afër ndeshjen mes Bristol City dhe Blackburn. Ata kanë vëzhguar sulmuesin Anis Mehmeti, një nga lojtarët më të rëndësishëm të Bristol City, i cili ka spikatur me performancat e tij të mira gjatë këtij sezoni.
Në vijim, stafi teknik i Kombëtares ka planifikuar vizita të tjera, për të ndjekur nga afër lojtarët e Kombëtares që aktivizohen në Europë. Kujtojmë se më 22 janar trajneri me stafin ishin në Pragë ku ndoqën sfidën e Champions League mes Spartës dhe Interit, ku përballeshin Qazim Laçi me Asllanin.