Kryeministri Edi Rama thotë se shumë persona po arrestohen pa gjyq. Kjo për shkak të frikës që gjykatësit kanë nga prokurorët. Rama hodhi akuza edhe ndaj Berishës, të cilin e quajti ”buf kënete”, që sipas tij po kërkon të shkrijë SPAK, gjë që sipas tij nuk do ia arrijë.
”Për herë të parë që nga viti 1991 nuk ka më deklarata nga ambasada e SHBA për reformën në drejtësi. Kush e mban tani SPAK-un dhe GJKKO-në larg duarve të bufit? E dëgjuat që tha do e shkrijë SPAK-un? Noc rrokun në 11 maj. Tjetër gjë është që të mbjellësh pemë, tjetër gjë është që të japësh drejtësi.
Ti mund të mbjellësh pemë, mund t’i mbjellësh edhe në korrik, pavarësisht se duhet të mbillen në dimër, por nuk merr në qafë njeri. Kjo drejtësia e re që ka 5 vjet, t’i kërkosh që të mos bëjë gabime është njësoj si t’i thuash një fëmije ”fol dhe shkruaj 3 gjuhë të huaja pa mësuar asnjë abetare”.
Kanë frikë nga prokurori gjykatësit dhe bien dakord që të fusin njerëz pa gjyq në burg, këta janë problem”,-tha Rama.