Vëllezërit kontrovers, Andrew dhe Tristan Tate kanë mbërritur në Aeroportin ndërkombëtar të Floridas, në Shtetet e Bashkuara, ka konfirmuar përfaqësuesi i tyre për media, pas largimit nga Rumania, meqë prokurorët rumunë janë pajtuar për t’ua hequr masën e ndalimit të udhëtimit jashtë vendit teksa ishin nën arrest shtëpiak, nën dyshimet për trafikim me qenie njerëzore dhe abuzime seksuale.
Njësia e prokurorisë kundër krimit të organizuar në Rumani, DIICOT, tha më 27 shkurt se gjykatësit kanë hequr masën e ndalimit për vëllezërit, që kanë shtetësi britanike dhe amerikane, pa dhënë hollësi se pse u është hequr masa e ndalimit të udhëtimit.
Njoftimi është bërë pak pasi ministri i Jashtëm i Rumanisë, Emil Hurezeanu, tha se rasti i vëllezërve është ngritur më herët gjatë këtij muaji nga Richard Grenell, i dërguari i presidentit amerikan, Donald Trump, për misione të posaçme.
DIICOT ka ngritur aktakuzë ndaj vëllezërve Tate dhe dy grave rumune, pasi ata u arrestuan në dhjetor të vitit 2022 nën dyshime për trafikim me qenie njerëzore.