Kryeministri Edi Rama tregon se po udhëton drejt Greqisë, për të marrë pjesë në panairin e punës që do të mbahet në Athinë. Ai shprehet se në këtë panair për herë të parë shqiptarët jashtë atdheut do të njihen me mundësitë që ofron Shqipëria për të.
“Rrugës për Greqi, nesër në panairin e punës në Athinë. Nesër Shqipëria sipërmarrëse shkon tek ta për të treguar punën që ofron. Kjo është hera e parë që Shqipëria e punës tregon derën për shqiptarët e Greqisë. Ejani e të flasim nesër me sipërmarrës për t’u njohur me mundësitë dhe kushtet e kontratave të punës. Pastaj gjykojeni vetë si të jetë më mirë për ju”, tha Kryeministri.
Kreu i qeverisë foli dhe për procesin e integrimit, duke i bërë zë edhe njëherë ambicies së tij që Shqipëria të jetë pjesë e BE brenda kësaj dekade.
“Mundësia e hyrjes në BE është kaq reale dhe dritarja e hapur shihet me sy. Shpejtësia me të cilën ne po ecim me hapjen e kapitujve është me e larta në historinë e integrimit. Dhe jo vetëm se ne po bëjmë detyrat por edhe ata janë të interesuar të na fusin. Ky është shansi ynë historik, për t’i thënë poshtërimeve të pafundme. Kjo është ngritja e flamurit për herë të dytë dhe shpallja e Shqipërisë anëtare e BE”, përfundon Rama.