Rezultatet e Primareve në Qarkun e Dibrës kanë “prodhuar” shifra interesante. Kandidatët në garë janë votuar kryesisht nga antarësia e rrethit ku ata kanë drejtuar apo milituar.
Më të “ndëshkuarit” nga demokratët e Qarkut të Dibrës janë deputeti Kreshnik Çollaku dhe ish deputetët Xhemal Gjunkshi e Përparim Spahiu, njëri mbështetës i Bashës dhe tjetri deputet i Lëvizjes Socialiste për Integrim.
Mësohet se degët lokale Mat, Dibër, Klos e Bulqizë bindën 2204 antarë të votojnë për 13 kandidatët në garë.
Pas publikimit të rezultateve mësohet se deputeti aktual Kreshnik Çollaku fitoi vetëm 3 % të votave, Xhemal Gjunkshi 5.3 % dhe Përparim Spahiu 6.3 %, rezultate këto që kanë befasuar garuesit në Primaret e fundit. Nga 2204 demokratë Çollakun e votuan 68 mbështetës.
Supriza e Primareve në Dibër ishte gazetari Basir Çollaku, i cili u rendit i treti në këto votime.
Ilir Krosi, më i votuari i kësaj gare brenda strukturave të PD-së dhe Basir Çollaku janë prononcuar në lidhje me rezultatet dhe kanë falenderuar të gjithë demokratët e rajonit për besimin e dhënë.