Enkelejd Alibeaj i përgjigjet Bashës pas tërheqjes nga rekursi në Gjykatën e Lartë për vulën dhe logon e PD, çështje e fituar në Gjykatën e Apelit nga Sali Berisha.
Basha e akuzoi Alibeajn për presion në mënyrë që të pranonte kushtet për të qenë në koalicionin ”Djathtas për Zhvillim”, në të kundërt tërhiqej nga rekursi për logon. Alibeaj thotë se nuk ka asnjë asnjë kapacitet ligjor për të kërkuar diçka nga partia e Berishës.
“Sa kohë që isha te PD e kam bërë këtë betejë ballazi, ndërkohë që jam tek “Djathtas 1912” juridikisht jam në një tjetër pozicion. Nuk kam asnjë kapacitet ligjor për të kërkuar diçka nga partia e Sali Berishës. Për këtë arsye akti juridik dhe politik është ky i sotmi; heqja dorë nga ai rekurs. Kur kam filluar betejën me Sali Berishën kam filluar vetëm nuk kam pyetur askënd”, tha Alibeaj.
Ai i kërkoi Bashës që t’i marrë mbrapsht kërcënimet dhe shantazhet dhe theksoi se nuk i është lutur për koalicion Bashës. ”Termat e kërcënimit e shantazhimit t’i marrë mbrapsht. Kam fytyrë dhe identitet. Nuk kërcënoj dhe shantazhoj askënd. Betejat do t’i bëjmë me Berishën në fushëbetejë politike, jo duke u zvarritur gjyqeve”,-tha në ”A2cnn”.