Kryetarja e Këshillit Kombëtar të Integrimit Evropian, deputetja Jorida Tabaku priti në takim ambasadorin e ri të Italisë, Marco Alberti. Deputetja e PD-së thotë se në takim u diskutua mbi sfidat që has vendi ynë në proceset zgjedhore.
”Italia, një vend mik dhe partner i ngushtë i Shqipërisë që prej rënies së komunizmit, ka ndjekur nga afër zhvillimet tona demokratike”, shkroi Tabaku në rrjetet sociale.
Për të raportet e OSBE/ODIHR, Transparency International, Freedom House dhe Departamentit Amerikan të Shtetit tregojnë qartë se zgjedhjet në vend po cenohen rëndë nga disa faktorë.
Tabaku renditi blerjen e votës dhe presionin mbi votuesit, keqpërdorimin e burimeve shtetërore, ndikimin e krimit të organizuar, manipulimin e listave zgjedhore dhe votimin familjar, polarizimin e medias dhe dezinformimin. ”Është koha që këto probleme serioze të adresohen me përgjegjësi dhe vendosmëri, për t’i kthyer qytetarëve besimin në demokraci”, përfundoi ajo.