Kryetarja e Kuvendit, Elisa Spiropali ka prezantuar kandidatët për deputetë të PS në Kavajë, Rrogozhinë dhe Kamëz. Në Kavajë dhe Rrogozhinë Spiropali prezantoi kandidatët Pandeli Majko, Ilva Gjuzi Daci, Antonela Dedej, Eldi Çepeli.
”Kavaja dhe Rrogozhina kandidojnë ekip fantastik. Pandeli Majko, ish-kryeministër, deputet e njeri që nuk ka nevojë për prezantim. Ilva Gjuzi Daci, Nënkryetare e Asamblesë Kombëtare të PS, Zëvendësministre e Turizmit dhe Mjedisit, nënë e tre fëmijëve, me përkushtim për t’u shërbyer qytetarëve e komuniteteve.
Antonela Dedej, zv/kryetare e Bashkisë Rrogozhinë, grua vullnetmirë, energjike dhe me kontribut në komunitetin e saj. Eldi Çepeli, profesionist e sipërmarrës, familje me vlera qytetare e kontribut në qytetin e Kavajës.
Partia Demokratike e ka përdorur Kavajën si hambar votash, pa i kthyer kurrë gjë mbrapsht. Bëni hesap. Kandidatin më të votuar në primare e spostoi, duke i lënë vendet e sigurta për tribunën VIP të kënetës. Përgjigjen do e marrin në 11 maj me fitoren tonë të madhe për Shqipërinë Europiane”, u shpreh Spiropali.
Në Kamëz Spiropali prezantoi kandidatët Lindita Nikolla, Sofika Lleshi, Kejsi Elezi dhe Halil Koloshi. “Kamza kandidon Lindita Nikollën, zonjllëku i së cilës nuk ka nevojë për prezantim. Sofika Lleshi, piktore dhe mësuese e dashur e fëmijëve të Kamzës. Kejsi Elezi, studente e Ekonomisë, lindur e rritur në Babrru, Paskuqan.
Halil Koloshi, mjeku i kudogjendur i Bathores, me origjinë nga Kukësi, i vetmi përfaqësues i gjinisë tjetër në listën e Kamzës, sot në Londër në takim me komunitetin shqiptar të zonës. Më 11 maj për Kamzën që ka rilindur, është transformuar e ka ndryshuar rrënjësisht”, u shpreh Spiropali.