Rikthehen takimet e PS-së me diasporën. Më 29 mars, kryeministri Edi Rama bashku me drejtuesin politik për Diasporën, Taulant Balla do të ketë takim me shqiptarët në Kretë dhe një ditë më pas (30 mars) me shqiptarët në Athinë.
Gjatë muajve të fundit, kryeministri ka ndërmarrë një tur takimesh me diasporën shqiptare në disa vende evropiane. Më 12 maj 2024, ai nisi këtë tur në Athinë, ku u prit nga mijëra shqiptarë në sallën “Christmas Theater” në stadiumin ”Galatsi”. Rama theksoi rëndësinë e forcimit të marrëdhënieve mes Shqipërisë dhe Greqisë, duke bërë thirrje për një histori të re bashkëpunimi.
Më 26 maj 2024, kryeministri zhvilloi një takim në Milano ku morën pjesë emigrantë shqiptarë nga qytete të ndryshme të Italisë. Rama foli për përfshirjen e diasporës në proceset vendimmarrëse në Shqipëri dhe mundësinë e votimit nga jashtë.
Kurse më 2 qershor 2024, ishte planifikuar një takim në Londër, por u anulua. Takimi i parashikuar në Gjermani më 16 qershor u anulua për shkak të zhvillimit të Kampionatit Evropian të Futbollit, duke e bërë të pamundur organizimin e një eventi të tillë.