Një përfaqësi prej rreth 2 mijë banorësh të disa fshatrave të Tropojës dhe Hasit kanë bllokuar për 30 minuta rrugën që të çon në pikën e kalimit kufitar me Kosovën, atë të Qafë Prushit.
Shkak i kësaj proteste, sipas vetë banorëve, është mungesa dhe lënia në harresë e nevojave që ka ky komunitet, në mënyrë të veçantë për rrugën Kam-Qafë Prush. Siç shihet edhe nga pamjet, rruga nuk ka parë asnjë investim në 34 vite demokraci, ndërsa të fundit që kanë vënë dorë në mirëmbajtjen e saj kanë qenë italianët, të cilët e ndërtuan thuajse një shekull më parë.
Banorët janë shprehur se kjo protestë ishte vetëm fillimi i reagimit të tyre, i cili, nëse nuk merret parasysh nga autoritetet, do të përshkallëzohet më tej. Nuk dihet ende nëse do të ketë reagime nga institucionet përkatëse, pasi në këto kushte, në zgjedhje lufta bëhet edhe për një votë.