Arba Kokalari është emri i parë mes kandidatëve shqiptarë që do të bëhet anetare e Parlamentit Europian. “Moderatët morën mandatin e katërt dhe unë hyra në Parlamentin Europian. Faleminderit të gjithëve që luftuan për mua dhe për Moderatët”, ka shkruar Arba në Twitter.
Moderatët suedezë janë partia simotër e PD-së, në PPE dhe urimi i parë për Arbën ka ardhur nga kreu i PD-së, Lulzim Basha.
Mesazhi i Bashes
Të dashur miq, sapo urova në telefon Eurodeputeten e parë shqiptare, shqiptaro-suedezen Arba Kokalari që u konfirmua pak çaste më parë si fituesja e mandatit të eurodeputetes për partinë e Moderatëve suedezë, simotrës tonë në Partinë Popullore Europiane!
Natë e paharrueshme për Arbën dhe familjen e saj, natë fitore për Moderatët që konfirmuan 4 eurodeputetë dhe natë historike për të gjithë ne shqiptarët që inagurojmë me Arba Kokalarin praninë shqiptare në ulëset e Parlamentit Europian!
Krenar dhe i lumtur me fitoren e Arbës, ju shpreh mirënjohjen time të gjithë bashkatdhetarëve tanë në Suedi që me votën e tyre e mundësuan këtë moment historik!
Dua po kështu t’ju falenderoj me mirënjohje në emrin tim dhe të Partisë Demokratike, të gjithë ju bashkatdhetarë të nderuar në vendet e BE që me votën tuaj për partitë simotra të PD, rikonfirmuat Partinë Popullore Europiane si forcën e parë politike në Parlamentin e ardhshëm Europian!